നമ്മുടെ വീട്ടിൽ ഒരു പൂന്തോട്ടം ഉണ്ടെങ്കിൽ അതിൽ ഉറപ്പായും റോസാച്ചെടികൾ ഉണ്ടായിരിക്കും. ചില കാര്യങ്ങൾ നന്നായി ശ്രദ്ധിച്ചുകൊണ്ട് പരിപാലിച്ചാൽ നമ്മുടെ വീട്ടിലും റോസാച്ചെടികൾ മനോഹരമായി നിലനിർത്തുവാൻ സാധിക്കും. അത് എങ്ങനെയൊക്കെയാണെന്നു പരിചയപ്പെടുത്തി തരികയാണ് ഈ ലേഖനം.
നടീലും പരിചരണവും
റോസാചെടി പൂച്ചെടിയിലും, നിലത്തും നട്ടുവളർത്താം. എവിടെയാണെങ്കിലും നല്ല സൂര്യപ്രകാശം ആവശ്യമാണ്. റോസ ചെടി ചെടിച്ചട്ടിയിൽ നട്ടുവളർത്തുന്നതിന് മണ്ണും, മണലും, ചാണകപ്പൊടിയും, ചകിരിച്ചോറും, എല്ലുപൊടിയും കൂട്ടിക്കലർത്തി ചെടിച്ചട്ടിയുടെ മുക്കാൽ ഭാഗത്തോളം നിറയ്ക്കുക. അതിലേക്ക് റോസയുടെ നടേണ്ട ഭാഗം വളർച്ചാ ഹോർമോണിൽ മുക്കി നട്ടുപിടിപ്പിക്കുക. റോസാച്ചെടി സാധാരണ പിടിച്ചു കിട്ടാൻ ബുദ്ധിമുട്ടാണ് അതുകൊണ്ടുതന്നെ തീർച്ചയായും വളർച്ചഹോർമോണിൽ മുക്കിയിട്ട് നടുവാൻ ശ്രദ്ധിക്കണം. റോസ തളിർത്തു വരുന്നതുവരെ തണലത്തു വയ്ക്കുക, വെള്ളം തളിച്ചുകൊടുക്കുക. റോസ തളിർത്തു വന്നതിനുശേഷം മാത്രം വെയിലത്തേയ്ക്ക് മാറ്റി വയ്ക്കുക.
അടുക്കളയിൽ നിന്ന് കിട്ടുന്ന തേയിലച്ചണ്ടി, മുട്ടത്തോട്, ഉള്ളിത്തൊണ്ട്, ഇറച്ചി കഴുകിയ വെള്ളം, അക്വേറിയത്തിലെ വെള്ളം എന്നിവയെല്ലാം ചെടി നന്നായി വളരുന്നതിനും, നന്നായി പൂക്കുന്നതിനും സഹായിക്കും. തേയില ചണ്ടി, മുട്ടത്തോട്, പഴത്തൊലിഎന്നിവ വെള്ളം ചേർത്ത് അരച്ച് റോസാച്ചെടിയ്ക്ക് ഒഴിച്ചുകൊടുക്കുന്നത് നിറയെ പൂക്കൾ ഉണ്ടാകുന്നതിന് സഹായിക്കും. ജൈവ സ്ലറി ഒഴിച്ചുകൊടുത്താൽ ചെടികൾ നന്നായി വളരുകയും, നല്ല വലുപ്പമുള്ള പൂക്കൾ ഉണ്ടാകുകയും ചെയ്യും. റോസാ പൂക്കൾ കൊഴിഞ്ഞു പോയതിനുശേഷം ആ കമ്പ് കവാത്ത് ചെയ്ത് നിർത്തണം എന്നാലാണ് പുതിയ നല്ല തളിർപ്പുകൾ വരുകയും, നന്നായി പൂക്കുകയും ചെയ്യുകയുള്ളൂ. ഈ രീതിയിൽ നട്ടുവളർത്തി പരിപാലിച്ചാൽഎല്ലാ ദിവസവും റോസാപ്പൂക്കളുടെ സുഗന്ധം നിങ്ങളുടെ മനസ്സിനെ ഉന്മേഷമു ള്ളതാക്കിത്തീർക്കും.
അഴകും, സുഗന്ധവും ഒത്തുചേർന്ന റോസാപൂക്കൾ പല നിറത്തിലും വലിപ്പത്തിലും ഉണ്ട്. സാധാരണ റോസാച്ചെടിയെ ബാധിക്കുന്നഏറ്റവും വലിയ പ്രശ്നമാണ് കുമിൾ രോഗം. ഏതെങ്കിലും തരത്തിലുള്ള കുമിൾരോഗം കണ്ടാൽ അസുഖം വന്ന ഇലകളും, തണ്ടും മുറിച്ചുമാറ്റി നശിപ്പിച്ചു കളയുക. അല്ലെങ്കിൽ മറ്റുള്ള റോസ് ചെടിക്കും ഫംഗസ് രോഗം പിടിക്കും. റോസാ ചെടിയിൽ കാണുന്ന പ്രധാനപ്പെട്ട ഒരു കുമിൾ രോഗമാണ് ഇലകളിലെ കറുപ്പ്പൊട്ട്. ഇലകൾ മഞ്ഞ നിറത്തിലും അതിൽ കറുപ്പ് നിറത്തിലുള്ള പൊട്ടും കാണുന്നു. മഴക്കാലത്താണ് കൂടുതലായും ഈ അസുഖം കാണപ്പെടുന്നത്. ജലാംശം കൂടുതൽ കെട്ടി കിടക്കുന്നതാണ് ഈ അസുഖം ഉണ്ടാകുവാൻ പ്രധാന കാരണം. അതുകൊണ്ടുതന്നെ റോസാച്ചെടിയുടെ ചുവട്ടിൽ വെള്ളം കെട്ടിക്കിടക്കുന്നത് ഒഴിവാക്കണം.
ധാരാളം ഇലകൾ തിങ്ങിനിക്കുകയാണെങ്കിൽ കുറച്ച് കമ്പുകൾ കവാത്ത് ചെയ്ത് നിർത്തണം. വേപ്പെണ്ണ എമൽഷൻ ഇലകളിലെ കറുപ്പ് പൊട്ടിന് വളരെ നല്ലതാണ് .അരലിറ്റർ വെള്ളത്തിൽ 60 ഗ്രാം ബാർസോപ്പ് ലയിപ്പിച്ച ലായനി ഒരു ലിറ്റർ വേപ്പെണ്ണ ചേർത്ത് നന്നായി ഇളക്കുക .ഇതിൽ പത്തിരട്ടി വെള്ളം ചേർത്ത് ചെടികളിൽ തളിച്ചുകൊടുക്കുക. കുമിൾ രോഗത്തിനുള്ള മറ്റൊരു പ്രതിവിധിയാണ് രണ്ട് ടീസ്പൂൺ വിനാഗിരി ഒരു ലിറ്റർ വെള്ളത്തിൽ കലർത്തി റോസാ ചെടിയിൽ തളിച്ചുകൊടുക്കുക. നാല് ദിവസം കൂടുമ്പോൾ ഇങ്ങനെ ചെയ്യുക. രണ്ടാഴ്ചത്തേക്ക് ഇതു തുടരുക തീർച്ചയായും കുമിൾ രോഗങ്ങൾ വരാതിരിക്കുന്നതിന് മാസത്തിൽഒരു പ്രാവശ്യം ഇങ്ങനെ ചെയ്യുന്നത് വളരെ നല്ലതാണ്.
റോസാ ചെടി നനയ്ക്കുന്നതിന് മുമ്പായിട്ട് ഇയുടെ മുകൾഭാഗവും അടിഭാഗവും ഒന്ന് ശ്രദ്ധിക്കുന്നത് വളരെ നല്ലതായിരിക്കും. ഒന്ന് ശ്രദ്ധിക്കുകയാണെങ്കിൽ റോസ യെ ബാധിക്കുന്ന അസുഖങ്ങളെ കണ്ടുപിടിക്കാനും, റോസ യെ കാർന്നുതിന്നുന്ന ചെറിയ പ്രാണികളെ കണ്ടുപിടിക്കാനും എളുപ്പമായിരിക്കും. റോസയുടെ ഇലകളുടെ അടിയിൽ ചെറിയ ഇലപേ നുകൾ കാണാറുണ്ട്. ഇല പേനുകൾ ഇലയിലെ നീര് ഊറ്റിക്കുടിച്ച് ഇലയുടെ പച്ചപ്പ് നഷ്ടപ്പെടുന്നതിന് കാരണമാകുകയും, ഇതിന്റെ ഫലമായി ഇലകൾ കൊഴിഞ്ഞു പോകുകയും ചെടികൾ തന്നെ നശിച്ചു പോകുന്നതായും കാണാറുണ്ട്. റോസയുടെ തണ്ടിൽ ശൽക്കകീടങ്ങൾ പറ്റിപ്പിടിച്ചിരുന്ന് റോസയുടെ തണ്ട് ഉണങ്ങി പോകുന്നതിന് കാരണമാകാറുണ്ട്. റോസിന്റെ പൂമൊട്ടിൽ ഇല പേനകൾ വന്നിരുന്ന് നീരൂറ്റി കുടിക്കുകയും, പൂവ് ഭംഗി ഇല്ലാതിരിക്കുകയും, കരിഞ്ഞു പോവുകയും ചെയ്യുന്നു . ഇതിനെല്ലാം വേപ്പെണ്ണ എമൽഷൻ വളരെ നല്ലതാണ്.
ഒക്ടോബർ മുതൽ ഡിസംബർ വരെയുള്ള സമയമാണ് റോസ് നടുവാൻ ഏറ്റവും നല്ല സമയം. ഏതു തരത്തിലുള്ള റോസാച്ചെടി ആണെങ്കിലും ഇലകളിലെ മുരടിപ്പ് രോഗം മാറാൻ വേണ്ടി പഴങ്ങഞ്ഞി വെള്ളം നേർപ്പിച്ച് ഒഴിച്ചുകൊടുക്കാം. ഇത്രയും കാര്യങ്ങൾ ശ്രദ്ധിക്കുകയാണെങ്കിൽ വളരെ നന്നായിട്ട് നമ്മുടെ വീടുകളിൽ റോസാച്ചെടി വളരുകയും നന്നായി പൂക്കുകയും ചെയ്യും.
Leave a Reply